15 лістапада ў цэнтральнай раённай бібліятэцы для вучняў 8 "Б" класа ДУА "Сярэдняя школа ім. М.В. Акцябрскай г.п. Лёзна" прайшла літаратурная гадзіна "Песняры зямлі беларускай", прысвечаная 140-годдзю з дня нараджэння Янкі Купалы і Якуба Коласа.
Творчая і асабістая дружба двух беларускіх класікаў – змястоўная старонка не толькі біяграфіі кожнага з іх, але і гісторыі ўсёй беларускай літаратуры і культуры.
Бібліёграф Аксана Кажэрава і загадчык аддзела абслугоўвання і інфармацыі цэнтральнай раённай бібліятэкі Вольга Юркова расказалі дзецям аб жыцці і творчасці Я. Коласа і Я. Купалы.
Навуковы супрацоўнік Лёзненскага ваенна-гістарычнага музея Святлана Саладкова пазнаёміла вучняў з найбольш цікавымі фактамі біяграфій гэтых знакамітых паэтаў. Таксама яна распавядала аб тым, што ў 1936 годзе Якуб Колас прыязджаў у Лёзна на прэм'еру спектакля па яго аповесці "Дрыгва".
